Syriac Apocalypse of Baruch (2 Bar 1-77)
1
title ܟܬܒܐ ܕܓܠܝܢܗ ܕܒܪܘܟ ܒܪ ܢܪܝܐ܀ ܕܡܦܩ ܡܢ ܝܘܢܝܐ ܠܣܘܪܝܝܐ. 1 ܘܗ̣ܘܐ ܒܫܢܬ ܥܣܪܝܢ ܘܚܡܫ ܕܝܘܟܢܝܐ ܡ̇ܠܟܐ ܕܝܗܘܕܐ̣. ܗܘ̣ܐ ܦܬܓܡܗ ܕܡܪܝܐ ܥܠ ܒܪܘܟ ܒܪ ܢܪܝܐ ܘܐ̣ܡ̣ܪ ܠܗ. 2 ܚܙ̣ܝܬ ܟܠܡܕܡ ܕܥ̇ܒܕ ܠܝ ܥܡܐ ܗܢܐ. ܒܝ̣ܫ̈ܬܐ ܕܥܒ̣ܕܘ ܗܠܝܢ ܬܪܝܢ ܫܒ̈ܛܝܢ ܕܦ̇ܫܘ. ܝܬܝܪ ܡܢ ܥܣܪܐ ܫ̇ܒ̈ܛܝܢ ܕܐܫܬܒܝܘ. 3 ♰ܫܒ̈ܛܐ♰ ܓܝܪ ♰ܩܕ̈ܡܝܐ♰ ܡܢ ܡ̈ܠܟܝܗܘܢ ܐܬܐܠܨܘ ܕܢܚܛܘܢ. ܗܠܝܢ ܕܝܢ ܬܪܝܢ ܗ̣ܢܘܢ ܐܠܨ̇ܝܢ ܗܘܘ ܘܥ̇ܨܝܢ ܠܡ̈ܠܟܝܗ̇ܘܢ̇ ܕܢܚܛܘܢ. 4 ܡܛܠ ܗܢܐ ܗܐ ܡܝܬܐ ܐܢܐ ܒܝܫ̣ܬܐ ܥܠ ܡܕܝܢܬܐ ܗܕܐ ܘܥܠ ܥܡܘܪ̈ܝܗ̇. ܘܬܬܪܝܡ ܡܢ ܩܕܡܝ ܥܕ ܙܒܢܐ. ܘܡ̇ܒܕܪ ܐܢܐ ܠܗ ܠܗܢܐ ܥܡܐ ܒܝܢܬ ܥܡ̈ܡܐ ܕܠܥܡ̈ܡܐ ܢܛܐܒ. 5 ܘܥܡܝ ܕܝܠܝ ܢܬܪܕܐ. ܘܢܐܬܐ ܙܒܢܐ ܘܢܒܥܘܢ ܡܨܠܚܢܘܬܗܘܢ ܕܙܒܢܝ̈ܗܘܢ܀