1 Enoch
The five books of Enoch deal with Enoch's visions and the fate of the righteous. A particular focus lies on the events preceding the Flood (the antediluvian primeval age) and their associations with the fall of the Watchers, as well as on the unfolding of history up to an eschatological endpoint.
1
1 ቃለ ፡ በረከት ፡ ዘሄኖክ ፡ ዘከመ ፡ ባረከ ፡ ኅሩያነ ፡ ወጻድቃነ ፡ እለ ፡ ሀለዉ ፡ ይኩኑ ፡ በዕለተ ፡ ምንዳቤ ፡ ለአሰስሎ ፡ ኵሉ ፡ እኩያን ፡ ወረሲዓን ። 2 ወአውሥአ ፡ ወይቤ ፡ ሄኖክ ፡ ብእሲ ፡ ጻድቅ ፡ ዘእምኀበ ፡ እግዚአብሔር ፡ እንዘ ፡ አዕይንቲሁ ፡ ክሡታት ፡ ወይሬኢ ፡ ራእየ ፡ ቅዱሰ ፡ ዘበሰማያት ፡ ዘአርአዩኒ ፡ መላእክት ፡ ወሰማዕኩ ፡ እምኀቤሆሙ ፡ ኵሎ ፡ ወአእመርኩ ፡ አነ ፡ ዘእሬኢ ፡ ወአኮ ፡ ለዝ ፡ ትውልድ ፡ አላ ፡ ለዘይመጽእ ፡ ትውልድ ፡ ርኁቃን ። 3 በእንተ ፡ ኅሩያን ፡ እቤ ፡ ወአውሣእኩ ፡ በእንቲአሆሙ ፡ ምስለ ፡ ዘይወፅእ ፡ ቅዱስ ፡ ወዐቢይ ፡ እማኅደሩ ፡ 4 ወአምላከ ፡ ዓለም ። ወእምህየ ፡ ይከይድ ፡ ዲበ ፡ ሲና ፡ ደብር ፡ ወያስተርኢ ፡ በትዕይንቱ ፡ ወያስተርኢ ፡ በጽንዐ ፡ ኀይሉ ፡ እምሰማይ ። 5 ወይፈርህ ፡ ኵሉ ፡ ወያድለቀልቁ ፡ ትጉሃን ፡ ወይነሥኦሙ ፡ ፍርሃት ፡ ወረዓድ ፡ ዐቢይ ፡ እስከ ፡ አጽናፈ ፡ ምድር ። 6 ወይደነግፁ ፡ አድባር ፡ ነዋኃን ፡ ወይቴሐቱ ፡ አውግር ፡ ነዋኃት ፡ ወይትመሰዉ ፡ ከመ ፡ መዓረ ፡ ግራ ፡ እምላህብ ። 7 ወትሠጠም ፡ ምድር ፡ ወኵሉ ፡ ዘውስተ ፡ ምድር ፡ ይትሐጐል ፡ ወይከውን ፡ ፍትሕ ፡ ላዕለ ፡ ኵሉ ፡ ወላዕለ ፡ ጻድቃን ፡ ኵሎሙ ። 8 ለጻድቃንሰ ፡ ሰላመ ፡ ይገብር ፡ ሎሙ ፡ ወየዐቅቦሙ ፡ ለኅሩያን ፡ ወይከውን ፡ ሣህል ፡ ላዕሌሆሙ ፡ ወይከውኑ ፡ ኵሎሙ ፡ ዘአምላክ ፡ ወይሤርሑ ፡ ወይትባረኩ ፡ ወይሀርህ ፡ ሎሙ ፡ ብርሃነ ፡ አምላክ ። 9 ወናሁ ፡ መጽአ ፡ በትእልፈት ፡ ቅዱሳን ፡ ከመ ፡ ይግበር ፡ ፍትሐ ፡ ላዕሌሆሙ ፡ ወያሐጕሎሙ ፡ ለረሲዓን ፡ ወይትዋቀስ ፡ ኵሎ ፡ ዘሥጋ ፡ በእንተ ፡ ኵሉ ፡ ዘገብሩ ፡ ወረሰዩ ፡ ላዕሌሁ ፡ ኃጥአን ፡ ወረሲዓን ።