1
1 ⲡϣⲁϫⲉ ⲙ̅ⲡ̅ϫⲟⲉⲓ̈ⲥ ⲁϥϣⲱ̅ⲡⲉ ϣⲁⲉⲓ̈ⲉ̅ⲣⲉⲙⲓ̈ⲁⲥ̅ ⲡϣⲏⲣⲉ ⲛ̅ϫⲉⲗϫⲓ̈ⲁⲥ ⲉϥϫⲱ ⲙ̅ⲙⲟⲥ · ϫⲉⲁ̅ⲗϫⲓ̈ⲥ ⲙ̅ⲡⲉⲓ̈ⲗⲁⲟⲥ · ϫⲉϣⲁⲧⲛⲁⲩ · ⲉ̅ⲧⲉⲧⲛ̅ⲉⲣⲛⲟⲃⲉ · ⲉ̅ⲧⲉⲧⲛ̅ⲟⲩⲉϩⲛⲟⲃⲉ̅ ⲉ̅ϫⲛ̅ⲛⲟⲃⲉ : ⲁ̅ⲛⲟⲙⲓ̈ⲁ̅ · ⲉ̅ϫⲛ̅ⲁ̅ⲛⲟⲙⲓ̈ⲁ · ⲙⲏ ⲙ̅ⲡⲁⲃⲁⲗ ⲛⲁⲩ ⲁⲛ ⲉ̅ⲛⲉⲧⲉⲧⲉⲛⲉⲓ̈ⲣⲉ ⲙ̅ⲙⲟⲟⲩ · ⲡⲉϫⲉⲡ̅ϫⲟⲉⲓ̈ⲥ · ⲉⲓ̈ⲉ ⲙ̅ⲡⲁⲙⲁ̅ⲁ̅ϫⲉ ⲥⲱⲧⲙ̅ ⲁⲛ ⲉ̅ⲛⲉⲧⲉⲧⲛ̅ϫⲱ ⲙ̅ⲙⲟⲟⲩ ⲙⲛ̅ⲛⲉⲧⲛ̅ⲉ̅ⲣⲏⲩ · ⲡⲉϫⲉⲡ̅ⲛⲟⲩⲧⲉ ⲡ̅ⲡⲁⲛⲧⲟⲕⲣⲁⲧⲱⲣ · ⲉⲧⲉⲧⲛ̅ϫⲱ ⲙ̅ⲙⲟⲥ ϫⲉⲁⲛⲛⲏⲥⲧⲉⲩⲉ̅ · ⲙ̅ⲡⲉⲡⲛⲟⲩⲧⲉ̅ ⲥⲱⲧⲙ̅ ⲉⲣⲟⲛ · ⲁⲩⲱ ⲁⲛⲥⲟⲡⲥ̅ ⲙ̅ⲡⲉϥⲧⲓ̈ϩⲧⲏ̅ϥ ⲉⲣⲟⲛ · ⲙⲏ ⲁ̅ⲧⲉⲧⲛ̅ⲛⲏⲥⲧⲉⲩⲉ ⲛⲁⲓ̈ ⲡⲉϫⲉⲡ̅ϫⲟⲉⲓ̈ⲥ ⲡⲁⲛⲧⲟⲕⲣⲁⲧⲱⲣ · ⲉⲓ̈ⲉ ⲧⲉⲧⲛ̅ⲡⲱⲣϣ̅ ⲛ̅ⲛⲉⲧⲛ̅ϭⲓ̈ϫ ⲉϩⲣⲁⲓ̈ ⲉ̅ⲣⲟⲓ̈ · ⲡⲉϫⲉⲡ̅ⲛⲟⲩⲧⲉ · ⲁⲗⲗⲁ ⲁ̅ⲧⲉⲧⲛ̅ⲛⲏⲥⲧⲉⲩⲉ̅ ⲙⲡ̅ⲃⲁϩⲁⲗ · ⲁⲩⲱ̅ ⲁ̅ⲧⲉⲛ̅ϯⲗⲩⲡⲉ ⲛⲁⲓ̈ · ⲉⲧⲉⲧⲛ̅ϫⲱ ⲙ̅ⲙⲟⲥ ϫⲉⲉϥⲧⲱⲛ ⲡ̅ⲛⲟⲩⲧⲉ ⲛ̅ⲁⲃⲣⲁϩⲁⲙ · ⲏ̅ ⲉ̅ⲛⲓ̈ⲙⲡⲉ ⲡⲛⲟⲩⲧⲉ ⲙ̅ⲡⲓ̈ⲏ̅ⲗ̅ · ⲁⲗⲗⲁ ⲧ̅ⲃⲁϩⲁⲗ ⲙⲛ̅ⲧⲁⲥⲧⲁⲣⲧⲏ ⲛⲁⲓ̈ⲛⲉ ⲛⲉⲧⲛ̅ⲛⲟⲩⲧⲉ · ⲉ̅ⲧⲉⲧⲛ̅ϣⲙ̅ϣⲉ · ⲛⲁⲩ ⲛⲧⲁⲩϫⲓ̈ⲙⲟⲉⲓ̈ⲧ ϩⲁⲧⲉⲧⲛ̅ϩⲏ :·-